بيومي فؤاد: "أول أجر خدته كان 750 جنيه.. وبدعي ربنا مقعدش في البيت"
تحدث الفنان بيومي فؤاد، عن كثرة مشاركته في الأعمال الفنية، مشيرًا إلى أنه لا يخجل من عمل كاستينج للعمل الفني قبل التعاقد عليه، وذلك خلال حواره مع الإعلامية إسعاد يونس، ببرنامجها صاحبة السعادة والمذاع عبر شاشة قناة DMC.
وقال بيومي فؤاد، إنه يحب العمل كثيرًا، ودائمًا يطلب من الله عدم الجلوس في المنزل دون عمل، متابعًا: أنا طالع لأبويا وبحب الشغل، وبدعي ربنا على طول أنه يكفينا قعدت البيت من غير شغل، وفيه ناس لما بتطلع معاش حالهم بيتغير لما بيقعدوا في البيت، ومن وأنا موظف حكومي كنت بعمل 3 مسرحيات في نفس الوقت، وكنت راضي وبحمد ربنا، فموضوع الكم ده من زمان
وعن رأيه في خضوع الفنانين لكاستينج قبل التعاقد على الأعمال الفنية، قال بيومي فؤاد: قبل الشهرة بشوية عملت كاستينج مع يسري نصر الله ومخدنيش، ولما قابلته بعد كدا اتكسفت أني أسأله، بس هو اللي قالي مش أنا كنت عملتلك كاست ومخدتش، عارف ليه؟ عشان أنت مكنتش لايق على الدور ده، مبتكسفش من أني أعمل كاستينج في السن ده، أحمد بدير ونور الشريف عملوا كاستينج مع يوسف شاهين في المصير.
وتحدث بيومي فؤاد عن أول اجر له من الفن، موضحًا أنه 750 جنيهًا، وعقب: عملنا بروفات لمسرحية مدة سنتين، وعرضناها في مركز الهناجر للفنون الكلام ده في سنة 1997، وأجري فيها كان 750 جنيه، والرقم ده أنا مصدقتش نفسي، معقول همثل والناس هتتبسط وكمان هاخد فلوس، هي دي النعم، أنا كنا بنصرف على المسرحيات قبلها.
