مجدي سعيد: "بضايق فنيا لما بقعد من غير شغل وعملت مشاريع وفشلت"

كشف الفنان مجدي سعيد عن رأيه في اتجاه الفنانين لعمل المشاريع قائلا: لو الفنان يقدر يعمل مشروع جنب الفن ياريت معرفش يرضى باللي ربنا قسمله بيه، عملت مشروعين والحمدلله فشلوا، عملت مزرعة أرانب وعملت كافيه لمدة سنة وبعتو.

وأضاف خلال حواره مع الإعلامية إنجي هشام في برنامج المنسي عبر قناة هي: المفروض الفنان ملوش الا فنه ورغم اني أنا شخص يشهد لي بالذكاء أو بالتجارب إنما  فشلت، لأن أنا شخص معندوش خبرة في الحاجة اللي بيعملها ومهما كان عندي دراية وخبرة يفرق عن حد دارس.

وتحدث عن مصدر دخله بجانب الفن قائلا: أنا بدرجة مدير عام في هيئة المسرح عندي معاش ومعاشي بكيف نفسي بيه، والفترة اللي مفيهاش شغل بضايق فنيا مش ماديا، بيتقالي انت فينك يا عم والسؤال ده طول ما انت ماشي الناس بتسأله، نفسي أمثل حاجة بحبها أنا عايز اتمتع قبل ما امتع المتفرج.

رأي مسلسل مجدي سعيد بمسلسل الحشاشين

بيتقالي إنت فينك يا عم والسؤال ده طول ما أنت ماشي الناس بتسأله، نفسي أمثل حاجة بحبها أنا عايز اتمتع قبل ما امتع المتفرج، ومسلسل الحشاشين بعتولي عليه من السنة اللي فاتت، وإن شاء الله يكون حاجة كويسة، هما صوروا في قبرص وكان المفروض هيتعرض رمضان 2023 لكن هيبقي في رمضان 2024.

وتابع: وبتعشم أكون محطوط في حاجة كويسة لأني لو مش محطوط في حاجه كويسة مش هشتغل، ودكتور بيتر راعاني أوي وأنا بحبه أوي وبيفرق لما بكون المخرج حابب الممثل، في مخرجين بيكرهوا الممثل أو هو شخصيًا بيكون نفسه يمثل ودي زمايلنا شافوها يعني».

رأيه عن الوسط الفني

وقال الفنان مجدي سعيد أيضًا: اللي بيكون فاهم في حرفية الشغلانه أوي بيحسها، في مخرج بيكون معندوش إلا النجم والنجمة والباقي ده كله جاي يكمل، وفي مخرج يقولك إيه أنت عندك أحسن من كده.

وأضاف: أنا مطلوب لحد اللحظة دي لكن بحاسب نفسي، بشوف هل ينفع ابني أو اختي يشوفوا ده، لو لقيت مينفعش لايمكن أعمله دايمًا إحساسي هو اللي بيوجهني قبل الأجر وقبل حاجات كتير لأن عندي ضمير شوية ودي مهمه جدًا لأن الفن رسالة ومش أي رسالة دي رسالة سامية

آخر أعمال مجدي سعيد

يذكر أن آخر أعمال مجدي سعيد كان مشاركته في مسلسل الاختيار الجزء الثالث والذي تم عرضه في الموسم الرمضاني لعام 2021، حيث جسد دور الارهابي محمود عزت، وكان العمل من بطولة ياسر جلال، كريم عبد العزيز، أحمد السقا، أحمد عز، ميرنا نور الدين، إيمان العاصي، صبري فواز، خالد الصاوي، وعدد كبير من النجوم، وتأليف هاني سرحان وإخراج بيتر ميمي.

مواعيد عرض برنامج المنسي

برنامج "المنسي" هو برنامج على قناة "هي" تقديم الإعلامية إنجي هشام، ويذاع يومي السبت والأحد في تمام الساعة الحادية عشر مساء ويستضيف عددا من نجوم الفن والإعلامين الذي غابت عنهم أضواء الشهرة والنجومية.