هاني مهنا يكشف كواليس أول لقاء جمعه مع أم كلثوم.. وحقيقة الحرب الحفية بينها وبين العندليب

كشف الموسيقار هاني مهنا، كواليس أول لقاء جمعه مع كوكب الشرق أم كلثوم، وحقيقة الحرب الخفية بينها وبين العندليب الأسمر عبد الحليم حافظ.

وقال خلال لقاء في برنامج "صباح العربية": "التعاون مع أم كلثوم جه مصادفة لسبب أم كلثوم رغم إنها سيدة مش اجتماعية ومش بتخرج أوي إلا أنها بتشوف تليفزيون كويس".

وتابع: "إحنا اتقابلنا مصادفة كان فيه حفلة عند السيدة الأولى زوجة أمير الكويت وكانت عاملاها على شرف أم كلثوم وبعدين قالتلها بتحبي مين قالتلها فايزة فجابتلها فايزة".

وأضاف: "كان بيني وبين أم كلثوم، مترين كانت لابسة النضارة وماسكة المنديل وحاطة رجل على رجل، فأنا بغني مع فايزة فهي بصت، فايزة راحت سلمت عليها ولكن أنا اتكسفت لقيتها بتبصلي وتشاورلي تعالى، قالتلي أنت مكسوف تسلم عليا قولتلها محبتش أزعجك قالتلي لا ازاي انت أحسنت جدا جدا ومتعتني بعزفك".

واستطرد: "وعدت الأيام وبعد 15 يوم هي اللي كلمتني في البيت شخصيًا، لأن طقوس الفنانين الكبار زي أم كلثوم وعبد الوهاب وعبد الحليم لما كانوا يعوزوا يكلموا حد كانوا بيكلموه شخصيًا مش يستنوا مدير أعمال، وقالت لي عندك مانع في شغل قولتلها ليا الشرف طبعًا قالتلي أنا قولت للأستاذ عبدالوهاب هيكلمك بعد نص ساعة وعندنا بكرة الساعة 11 في 35 في التليفزيون بروفة، وكانت ليلة حب وكان أول لقاء بينا واستمر بعدها".

وعن الحرب الخفية بين أم كلثوم والعندليب قال "مهنا": "مش حرب خفية ولا حاجة، عبدالحليم بس غلط مرة في التعبير في حفلة كانت بتجمعه بأم كلثوم، لأنها كانت لما بتروح أي حفلة كانوا بيسألوها: انتي تحبي تطلعي الساعة كام؟ حسب رغبتها، فهي نجمة كبيرة وست مش صغيرة، وكانت بتقول لهم هطلع الساعة كذا".

واختتم: "جه حظ عبد الحليم، في حفلة من دول، وطلع فقرتين قبل أم كلثوم، وبعدين أم كلثوم وحليم تاني في الآخر، فجه قال في الحفلة وكانت على الهوا مطلعني في الآخر لأني نجم الحفلة ولا دا مقلب، الكلمتين دول ضايقوا أم كلثوم، وكأنهم جرحوها وبدأت الصحافة تكتب والموضوع زاد، ولكنه في فرح كان الاتنين معزومين عليه راح باس إيدها وقالها أنا آسف، والتلج بينهم ساح".