حمو بيكا لـ "هاني شاكر": مش كل واحد يبقى عنده سلطة يتحكم في البشر.. حسوا بيا
وجه مؤدي المهرجانات حمو بيكا، رسالة لبعض المتنمرين عبر صفحته الشخصية موقع تبادل الصور والفيديوهات "إنستجرام".
ونشر بيكا صورة جديدة له وعلق عليها قائلا: "يا جماعة ياريت نفهم إن أنا موجوع وتعبان، كفاية تنـمر عليا، اتنـمر عليا مرة واتنين وتلاتة ولسه فيه ناس بتتنمر عليا.. بتتنمروا عليا لحساب مين؟!.. أنا بني آدم زي زيكم والله".
وتابع "هاني شاكر.. حضرتك كنت في ندوة واتنـمرت عليا وإنت أخويا الكبير وأنا مسامح والله بس كفاية بالله عليك، أنا أه مش بعرف أقرأ وأكتب بس ربنا خلقلي قلب أحس بيه، كفاية تجرحوني، مش كل واحد يبقى عنده سلطة يتحكم في البشر؟!".
وأكمل حديثة مضيفا: "أنا 5 سنين بعاني وبعافر بس هما شايفين إن إحنا مبسوطين وفرحانين، لا أنتوا اللي مبسوطين وإنتوا اللي معاكم ومعاكم كتيييير وعندكم كتيييير بس عمرنا ما بصينالكم.. هو ليه لما يكون معايا حاجه حد يبصلي فيها وعايز يأخدها ؟! ده غير مرضي اللي بدفعله في الشهر كتير أوي".
وأضاف: "حسوا بيا، لو غلطت في حاجه تعالي وحاسبني وعلمني الصح من الغلط.. فاتح بيت وعندي أسرة وعندي مسؤوليات كتير محدش يعلم بيها إلا ربنا،، ارجوكم كفاية".
واختتم حديثة قائلا "ياريت تحكموا بينا بالعدل زي ما ربنا سبحانه وتعالى بيقول: " وَإِذَا حَكَمْتُم بَيْنَ النَّاسِ أَن تَحْكُمُوا بِالْعَدْلِ.. وكفاية تنمر عليا وافتكروا كلام ربنا:" يَا أَيُّهَا الَّذِينَ آمَنُوا لَا يَسْخَرْ قَوْمٌ مِنْ قَوْمٍ عَسَى أَنْ يَكُونُوا خَيْرًا مِنْهُمْ “.. وفي النهاية شكرًا لكل حد بيدعمني وبيحبني".
