محمود عامر يكشف عن تعرضه لسوء تعامل من الوسط الفني.. تفاصيل
كشف الفنان محمود عامر، عن أزمة تعرض لها من الوسط الفني، وذلك من خلال حسابه على موقع التواصل الاجتماعي “فيسبوك”.
وكتب “عامر” قائلا: “: مش هقول أني فنان محصلتش، وأني معرفش إيه ولا المفروض معرفش أكون في مكان إيه، أبدًا، كل الحكاية ببساطة إن أنا فنان ودي شغلتي ومهنتي وعمري كله، وحياتي كفنان فيها إخفاقات، وإحباطات ونجاحات، وربنا هو وحده مقسم الأرزاق”.
وأضاف: “لكن في ناس مصرين على التعامل بشكل غير مرضي، ومؤذي نفسيًا مع الفنانين، والواحد مبيتعلمش للأسف الشديد، الحكاية أنهم كلموني في مكان ما، على شغل، واللي كلمني قالي معلش المخرج عاوز يشوفك، لأنه مش عارفك كويس، قلت له يدخل على النت ويكتب اسمى ويشوف ويعرفني قالي معلش حضرتك، عاوز يشوفك شخصيًا، لأنه محتاجك في حاجة معينة، حاضر تمام رحت، وقدمت المطلوب، وقابلت المساعد الأول والمخرج مجاش، يومين واتصلوا وقالولي من فضلك ابعتلنا مقاساتك في اللبس وخلافه، وإن شاء الله التصوير يوم الجمعة لو ظروفك سامحة، تمام سامحة إن شاء الله، لغاية الخميس بالليل لاحس ولا خبر، سألت إيه الحكاية يا جماعة، قالولي معلش يا أستاذ المعاد بقا يوم السبت، فاضي إن شاء الله؟”.
واستكمل حديثه قائلا: “: تمالكت أعصابي وقلت إن شاء الله فاضي ماشي، الجمعة بالليل كتبولي على الواتس، معلش يا أستاذ محصلش نصيب، الكلاينت معرفش إيه وبنعتذرلك، وإحنا كمان بنعتذرلك.. ده بقا اسمه إيه؟.. عارف أنه مش رزقي، وعارف أنه كله نصيب، لكن الواحد يقول إيه في الموقف ده، فعلا شغلتنا دي مدمرة نفسيًا وعصبيًا، وملهاش أي كتالوج، لكن برغم كل ده لسه عندي طاقه أقدر أقول إن بكرة أحلى”.
