لا تكن ضحية المك

بوابة الفجر
Advertisements
صباح الخير استاذة نيفين وكل عام وحضرتك بخير .. عندي مشكلة يمكن تكون غريبة او مختلفة عن باقي المشكلات اللي حضرتك بتستقبليها لكن مهم بالنسبالي ابعتلك يمكن اقدر اساعد بتجربتي الناس بالاضافة الى انك ممكن تقوليلي حاجة تفيدني زي ما افادني طبيبي الخاص.. انا بقالي حوالي خمس سنين بروح لطبيب نفس لعلاجي من الاضطرابات النفسية نتيجة حياة صعبة عشتها وماشي الحمد لله كويس مع الطبيب دة لكن من وقت للتاني ساعات بحس اني فجاة اتعزلت عن كل شيء حتى اهل بيتي وبفقد القدرة على التعامل معاهم وبفضل اني ابعد عن اي تواصل او اشتراك معاهم في اي مناقشة مهمة لاني ببقى حاسس انهم في وادي وانا في وادي تاني ودة في حد ذاته بيتعبني واحيانا بيعصبني .. مشكلتي مع المحيطين المقربين انهم مش عارفين يتعاملو معايا وقت ما بمر بازمة معنوية ومش فاهمين طبيعة ضيقي ووجع قلبي محدش فاهمه غير الدكتور بتاعي واللي مضايقني في الموضوع اني مش ممكن افضل عايش واللي حوالية فاقدين الفهم لطريقة التعامل معايا ودة بيخليني احس بالوحدة .. قتلتني الوحدة والخوف والقلق .. اتكلمت في الموضوع دة مع طبيبي الخاص وكان الصراحة مشكورا رده علية معقول لكن قلت ابعتلك زي ما كل الناس بتعمل واللي خلاني اقتنع اني اروح لطبيب التخصص دة يخليني ما اخجلش اني ابعتلك .. انا بعت رسالتي دي وانا حاسس ان مش ضروري الاقي عندك اجابة لكن كان جزء من مساعدتي في العلاج والخروج من ازمتي اني اطلع اللي جوايا وتاني سبب اني ببعت رسالتي دي لكل اللي هيشوفوا رسالتي وعندهم مشكلتي .. يمكن اقل او اكتر كل واحد حسب ظروفه لكن بقولهم من خلالك ارجوكوا ما تقصروش في حق نفسكم وتعيشوا بجبل الحزن اللي انتوا شايلينو بسبب خجلكم من زيارة طبيب التخصص دة وهو الطب النفسي انا بعتبره من اهم التخصصات اللي لازم نتردد عليها من وقت للتاني حتى لو مكنش عندنا شكوى واضحة او محددة .. ربنا ما علمش البشرية عشان بحتفظوا بعلمهم لنفسهم او يحطوا ابحاثهم في ادراج المكاتب والتخصص دة زيه زي الباطني والقلب والعظام وغيرها من العلوم العظيمة المفيدة للبشرية .. يا جماعة .. اذا انا كنت في يوم من الايام وصلت لمرحلة اني مش قادر اقوم من سريري من كتر الالم النفسي وبالتالي قلب عضوي .. انا النهاردة قاعد وقادر افتح صفحة علشان اكتبلكم الكلام دة .. ودة بالنسبالي انجاز وتقدم كبير .. نفسي كل الناس اللي حاسة باي ضيق باي درجة تبدا تفكر جديا في اللي كتبته النهاردة .. انا النهاردة قادر اكشف عن اسمي .. انا محمد محسن اللي فضلت شهور اراسل استاذة نيفين حجازي جزاها الله خير وكنت بطلب منها عدم النشر لحرجي من فكرة النشر .. وهية ساعدتني ودلتني على طبيب كتر خيره هوة كمان على مساعدتي ودلتني على معالج تاني علشان اتابع معاه ادق تفاصيل حياتي اللي محتاج اطلعها من جوايا لانها كانت حمل كبير مش قادر اعيش بيه .. الحقيقة محتاج اقولكم قبل ما اقفل كلامي .. هية جملة واحدة .. ماتسبوش نفسكم فريسة لاوجاع العمر .. اسف استاذة نيفين على الاطالة في رسالتي لكن حسب نصيحة طبيبي اني اشارك الناس عشان افيد الناس واكيد المشاركة دي هتخليني افيد نفسي برضه .. اشكر الجميع على سعة صدره .. والسلام عليكم ورحمة الله .

فضفضة
محررة الصفحة .. نيفين حجازي
محمد .. لا اجد كلام اصف به سعادتي برسالتك اليوم .. ربما اكون سعيدة اكثر منك .. اليوم اجني ثمار اشهر كثيرة تكلمنا فيها وبحثنا بشتى الطرق لنصل الى ما وصلت اليه انت اليوم وانا التي اشكرك على مجهودك في مقاومة المك والصبر على ما لا يتحمله بشر .. صديقي العزيز محمد .. ارجو اليوم ان تكون رسالتك قد اصابت بخيرها  قلوب كل من سيقراو رسالتك .. وانا شخصيا استفدت من كلامك كثيرا .. انت تعلم انا لا اجامل ابدا لكن من واجبي ان اقول الحق واقول ما اشعر به ، واخيرا .. احييك على تخطيك بمساعده الله سبحانه وتعالى صعاب كثيرة .. في نهاية كلامي ارجو من كل من يقرا هذه الرسالة ان يراجع نفسه ولا يكابر  ولا يخجل .. فنحن بشر .. وكما خلق الله الضحك ايضا خلق البكاء .. وبالنسبة لشعورك بالعزلة وغيرها من المشاعر الغير مرغوب فيها .. هذه مشاعر طبيعية ربما يمر الكثير منا بها .. لا تتعجل في ابداء رايك تجاه مشاعر انا متاكدة انها ستزول مع الاستمرار في تعليمات الطبيب ولا تقلق ابدا كل شيء سيمر  .. تحياتي للجميع وتحياتي بالاخص لمحمد صاحب الرساله