أسرار وتكات تحضير البشاميل في المنزل (فيديو)
المكرونة البشاميل مكوناتها بسيطة ومعروفة وهي عبارة عن مكرونة ولحمة مفرومة و بشاميل ولو عاوزة تجهزيها زي المحترفين والمطاعم هنقولك على سر الخلطة
لما تيجي تسلقي المكرونة حطي عليها نقطتين من الخل مع الملح بدل الزيت وقومي بسلقها نص تسوية
حطي الملح على المكرونة عند السلق زي ما بتحطيه على اللحمة المفرومة والبشاميل بس خلي بالك لازم بكميات متساوية
اوزني كويس بين كمية الدقيق وكمية السمنة وقت عمل البشاميل لأن عدم توازنها بيسبب تكتل البشاميل ويبقى سميك أو خفيف أكثر من اللازم.
ولو البشاميل اتكتل معاكي ارفعيه فورا من على النار واضربيه ف الخلاط وصفيه ف المصفاه وحطيه مره اخرى على النار علشان تكملي تسويته
اوعي تحمري الدقيق ف السمنة جامد، لانه بيغير طعم البشاميل اديه بس لون ذهبي فاتح ودا هياخد وقت منك من 5 لـ10 دقايق بالظبط
لما تيجي تضيفي الحليب حطيه مرة واحدة وقلبي باستمرار وخلي بالك لازم يكون دافي علشان الدقيق ميبقاش كتل
متحطيش توابل كتير ف البشاميل واكتفي بالملح والفلفل الاسود، وابقي حطي فيه قطعتين جبنة مثلثات او جبة كيري او كريمة طبخ
وبعد رص المكرونة والبشاميل واللحمة المفرومة ف الصينية حطي بيضة مخفوقة مع جبن موتزريلا او اكتفي بالجبن بس
وسخني الفرن على درجة حرارة 180 درجة لمدة ¼ ساعة، وشغلي الشواية من 10-20 دقيقة وخرجي الصينية من الفرن وبكده تكون المكرونة بالبشاميل جهزت معاكي وبالهنا والشفا
