ابويا حرامي وانا اللي هتوبه
مساء الخير انا شاب عندي ٢٦ سنه للاسف لية اب من اشهر رجال الاعمال واكتشفت بالصدفة انه حرامي وطريقة شغله غير مشروعة وداس علي ناس كتير وهوة في يوم من الايام كان قدوتي وقلت اول ما هكبر واخلص دراستي هشتغل معاه عشان اكمل ابني اسمه وللاسف لما حصل اكتشفت كل ده وما خفي كان اعظم .. مقدرتش اتحمل الصدمة وتحولت من شاب الناس كانت بتحسده عليه الي شبح قتلته المخدرات والهيروين تحديدا ودخلت في حالة اكتءاب حادة رحت بسبب الاتنين اتعالج منهم لكن كل مرة بحاول العلاج اطلع انتكس ومعرفش ليه عندي احساس قوي جدا بالانتقام من ابويا في نفسي عايز ادوقه هوة عمل ايه في الناس واسرهم واقسمت بالله اني هكمل ادمان لغاية ما اموت خصوصا اني ابنه الوحيد وهحسر قلبه عليه عشان يعيش بقيت عمره بحسرته عليه صحيح انا خسرت كل حاجة بس مش اكتر من خسارتي في ابوية اللي صدمني في ضميره الميت .. طبعا واجهته وكلمته كتير بافعاله انكر وهزقني وطردني برة الكوكب الملوث بتاعه والهيلمان اللي ربنا انعم عليه بيه لكن هوة طماع .. انا النهاردة مش باعت رسالتي عشان محتاج مساعدة المساعد ربنا لكن باعتها عشان تكون قصتي عبرة لكل الاهالي الغافلين انهم بيحطموا احلي حاجة جوة اولادهم وبقصد او بغباء او بطمع .. والله لولا شوية اعتبارات انا كنت افصحت عن اسمه وفضحته لكن امي ملهاش ذنب تشيل عاره كفايه عليه انا وكفاية عليه عذاب ربنا
اسف علي وجع قلوبكم .. لكن انا خلاص شبه بموت ومرتاح اني رايح لطريق الموت .. اللهم بلغت اللهم اشهد
نور
فضفضة
محررة الصفحة .. نيفين حجازي
يا نور انا معاك ان فيه كتير من الاهالي بيتسببوا في ايذاء ابناؤهم بقصد او بدون لكن ده مش معناه انك تقتل نفسك علشان تعاقب ابوك انت كده عاقبت نفسك وبزياده .. وان كان في حد لازم يعيش في عذاب فهو الاب مش انت .. انا شايفة انك تروح تتعالج وفورا وتسيب والدك لله هوة خلقه وادري بيه وممكن كمان تبعد شوية عنه بانك تشتغل اي حاجة تانية وتروح لحد من رجال الدين تستشيره في شرعية التعامل مع هذا الاب والتصرف السليم تجاه والدك خلص نفسك امام الله من ارتكاب ذنب يمكن يكون اكبر من ذنب والدك لانك بتهدر نعمة الصحة وحق الحياة اللي ربنا انعم بيهم عليك .. اناعاذراك تماما لكن خلي رد فعلك يساوي حجم المشكلة مش تبالغ فيه .. انت في الاخر اللي هتخسر دنيا واخرة .. موضوع والدك ده يمكن يكون ابتلاء من الله واجب عليه تتقبله وتحاول تتكيف مع البلوة دي لكن مش منطق ابدا وانت في عز شبابك تنهي حياتك بالقسوة دي وزي ما قلت علي والدك انه افتري ما انت كمان دلوقتي بتعمل اسوآ منه لكن في نفسك اللي ربنا وصانا عليها .. موضوع والدك له الف طريقة للتعامل معاها او حتي حلها لكن اللي ات فيه ده انت صعبت المشكلة عليك لان الخروج من الادمان مش بالسهولة دي ومحتاجة منك ارادة رهيبه وقرار وسرعة تحرك الي طبيب معالج سلوكيات وطب نفس علشان يساعدك في تخطي المشاعر والغضب الرهيب اللي انت شايله في قلبك تجاه والدك .. لو كلنا واجهنا مع اهالينا مصايب وعالجناها باننا ننتقم من نفسنا الدنيا هتخلص .. صدقني مش هوة ده الحل وارجوك طالما اخترت تبعتلي حتي لو للعبرة زي ما قلت ارجوك تفكر في كلامي وتعيد ترتيب قراراتك انقذ نفسك من هلاك محقق ارجوك انا يصعب عليه اقسم بالله استقبل رسالة زي دي لكن انت تستاهل افضل من الوضع الحالي بكتير .. ارجوك فكر
