الكلاب تعوي والقافلة تسير

فضفضة

أرشيفية
أرشيفية


مساء الخير 
استاذة نيفين اخبار حضرتك ايه يارب تكوني بخير ..
دلوقتي انا عندي مشاكل في شغلي كتيرة مش بسبب الشغل نفسه قد ماهوة بسبب البني ادمين اللي عاملين فيها زمايلي .. كمية ضغط عصبي غير عادي لدرجة اني بفكر جديا اسيب الشغل وامشي وهتكون دي للمرة التانية وبرضه بسبب الناس .. انا من اول ماروح الصبح الشغل ببدا شغلي عادي واقول مليش دعوة بحد لكن اتفاجيء بكمية افخاخ غير عادية وللاسف بتآثر بالسلب علي شغلي وبالتالي تقدير المديرين لية .. زهقت وقرفت من كتر المقاومة واستخدمت طريقة قلت بيها اكسر سم الناس وهية اني اتجاهل اللي بيعملوه وكمان مش هشتكي علي اساس ان يمكن التجاهل دة يديهم احساس ان مفيش نتيجة من اللي بيعملوه .. مش عارف هل هية طريقة صحيحة ولا اتصرف بشكل تاني .. والغريبة ان الناس دول محصلش بيني وبينهم اي مشاكل اصلا ومش عارف همة حاطني في دماغهم ليه .. ارجو الرد سريعا يا استاذة نيفين ولعل كلامك يريحني شوية بدل النار الي انا فيها اخوكم محسن المحمدي

فضفضة
محررة الصفحة .. نيفين حجازي
استاذ محسن فيه معلومة افضل اوضحها لحضرتك وهية ان الخلافات بين الناس في العمل ما بقتش السبب فيها خلاف بين الناس لكن احيانا بيكون شغلك المميز بيكشف ضعفهم او اهمالهم فبالتالي يدخلوا معاك في حرب للايقاع بيك او لاسباب اخري برضه هتلاقيها بعيد عن انك احتكيت بيهم .. عموما .. توكل علي الله اولا ثم خليك مركز في شغلك اكتر وبطريقة احترافية اكتر ولا تنظر الي الخلف تحت اي ظرف لكن لو لقيت ان الموضوع هيدخل في مرحلة ان الكلام هيسيء ليك او هيآثر علي شغلك ادخل للمدير واحكيلة عن انجازاتك الفترة اللي فاتت وبلغه بخططك اليومية لانجاز شغلك كما لو انك بتاخد رآيه لو كان الامر محتاج مشورة او اضافة او ما الي ذلك .. منها هتبقي قدمت تقرير علي سبيل المشورة ومنها لو كان عنده سوء ظن فيك من كلام الاخرين هوة لواحده هيلاحظ الفرق بين واحد عايز يشتغل وبين ناس فاضية للنميمة وبس وفي الوقت نفسه مش هتبقي ورطت نفسك قدامه وتتقدر انك من الناس اللي بتشتكي وناسية شغلها .. الشغل دون الالتفات لافخاخ الاخرين اوقع رد عي نفوس ضعيفة واكتر حرفية .. الكلاب تعوي والقافلة تسير .. وربنا معاك ويوفقك في كل امورك