هالة فاخر عن خناقة الأزواج على "باسورد الموبايل": "يعني خلصتم مشاكلكم كلها"

قالت الفنانة هالة فاخر، إن "باسورد الموبايل" يسبب العديد من المشاكل بين الأزواج، مضيفه: "نجد الرجل يجلس في بيته ماسك الموبايل، ومرة وحده صوت ضحكته يعلى، ومش واخد باله إنه متراقب من مراته، لدرجة أنها ممكن تقوله هو عمل كام شهيق وزفير وهو قاعد".

وأضافت "فاخر"، خلال تقديمها برنامج "انتبهوا أيها السادة" عبر فضائية "الحياة"، اليوم الأربعاء: "مراته هاتقوله إيه ضحكتك دي، إنت آخر مرة ضحكت لما مجدي عبدالغني جاب جون، ناس ليها ضحك وناس ليها نكد، فيرد هو أنا لازم أكون باكلم واحد، فترد عليه، طب هات الموبايل أشوف بتضحك على إيه؟، فتجد الباسورد، وعندما يقول لها افتحهولك تقوله لو ماشي صح، ليه عامل باسوورد للموبايل، وفى الآخر يتخانقوا وتقوله طلقني".

وتابعت "فاخر"، مخاطبة الأزواج: "هى كل مشاكلكم خلصت وباقي باسورد الموبايل، ليه بتدوروا لبعض على المشاكل، كل واحد يخليه في موبايله كل واحد ليه خصوصيته حتى لو كان زوج أو زوجة، مش ممكن البجاحة توصل إن زوجك يكلم اللى بيخونك معاها قدامك، تعالى على هذه المواقف".